Rriten temperaturat, shtohen helmimet.

Temperaturat e larta të këtyre ditëve kanë rritur edhe numrin e personave të helmuar apo me crregullime gastrointernale të cilët kanë kërkuar ndihmën e mjekëve në urgjencën e Spitalit Infektiv në Tiranë.Mjekët sqarojnë se cilësia e ujit, konsumimi i ushqimeve jo të freskëta dhe të ruajtja tyre në kushte jo të mira higjenike, janë shkaktarët kryesorë të këtyre helmimeve.

Mjekët këshillojnë që qytetarët të zgjedhin vendet e blerjes së frutave dhe perimeve si dhe të mos përdorin ushqime të gatshme dhe ëmbëlsira që shiten nga tregtarë ambulantë.

Por sipas tyre problem paraqet shumë edhe uji, i cili në masën më të madhe është ujë depozite të cilat pastrohen rrallë.

Mjekët thonë se uji i ndenjur i depozitave është bartës i madh bakteresh dhe përdorimi i tij pa u zier shkakton crregullime në organizëm.

Sipas diagnozave të shënuara në regjistrin e urgjencës së infektivit janë të shumtë pacientët që kanë kërkuar ndihmën e parë pasi kanë konsumuar në bare, lengje apo pije të ngrohta.

Edhe këto shqetësime sipas mjekëve kanë buruar nga përdorimi i ujit të depozitave për përgatitjen e kafeve dhe pijeve të tjera dhe për këtë arsye ata kërkojnë marrjen e masave nga strukturat përkatëse të shëndetësisë.
Por me rritjen e temperaturave duhet të shtohet edhe higjena për të gjitha produktet që konsumojnë. Mjekët kërkojnë që cdo produkt të konsumohet pasi të jetë larë mirë dhe të jetë i ruajtur në vende të freskëta si dhe të kontrollohet data e skadencës së cdo produkti që blihet, sic janë lëngjet e frutave, qumështi i ambalazhuar etj.

(top-channel.tv)