Pranimet e studentëve të rinj në Fakultetin e Gjuhëve të Huaja në Tiranë edhe gjatë këtij viti do të bëhen pa konkurs të veçantë pranimi, një kërkesë kjo e vazhdueshme e drejtuesve të këtij institucioni të arsimit të lartë. Drejtues të këtij fakulteti bëjnë të ditur se për pranimet e këtij viti nuk do ketë kritere pranimi dhe se seleksionimi i studentëve do të bëhet në vitin e dytë. Kështu, megjithëse çdo vit para nisjes së procesit të Maturës, për rrjedhojë edhe të konkurrimit për në universitet, Fakulteti i Gjuhëve të Huaja i ka kërkuar Ministrisë së Arsimit që pranimet në këtë fakultet, përveç rezultateve të Maturës, të bëhen edhe me konkurs pranimi, për shkak të nivelit të dobët të studentëve që vijojnë studimet në të, ky propozim nuk është miratuar as këtë vit. Kjo do të thotë se edhe gjatë vitit të ri akademik pjesa më e madhe e studentëve që do të konkurrojnë për të ndjekur shkollën e lartë në një prej gjuhëve të huaja, do të shpallen fitues në bazë të pikëve të Maturës, dhe eksperienca ka treguar se pjesa më e madhe e tyre nuk kanë aspak njohuri për gjuhën që u del e drejta e studimit.
Prej gati 5 vitesh Fakulteti i Gjuhëve të Huaja ka dhënë alarmin për nivelin e ulët të studentëve që rezultojnë kalues, thënë ndryshe, numrin e lartë të studentëve jokalues dhe shifra është vërtetë tronditëse. Gati 80% e studentëve që ulen për herë të parë në auditorët e këtij fakulteti, nuk arrijnë të kalojnë stadin e vitit të parë, sidomos për gjuhët turqisht, greqisht, gjermanisht apo rusisht. Rezultate disi më të pranueshme ka vetëm dega e anglishtes dhe italishtja.
Sipas drejtuesve të fakultetit, të rinjtë edhe pse shpallen fitues nga MASH kanë mungesë të theksuar njohurish në gjuhët e huaja, të cilat i kanë përzgjedhur. Kësisoj, Fakulteti i Gjuhëve të Huaja po përballet çdo vit me shumë studentë të painformuar për gjuhën që kanë zgjedhur të studiojnë. Studentët, megjithëse kanë vënë në preferencat e tyre gjuhët e huaja, vijnë në fakultet pa asnjë njohuri rreth tyre.
Për këtë arsye, gjithmonë sipas drejtuesve të këtij fakulteti, është mëse e domosdoshme vendosja e kritereve të reja të pranimit për në universitet dhe zgjidhja e situatës për ata studentë që kanë hyrë tashmë në fakultet, për të mos humbur ato vite studimi që kanë kryer. Për zgjidhjen e këtij problemi është propozuar që vitin e parë studentëve t’u ofrohet një njohuri bazë rreth gjuhëve të huaja, ndërsa në vitet e tjera të ketë zhvillim të mëtejshëm të njohurive. Pra, Fakulteti i Gjuhëve të Huaja për studentët që nuk e njohin fare gjuhën ku studiojnë ka krijuar disa lehtësi, si kalimi i lëndëve teorike në vitin e dytë dhe më shumë orë për njohjen e gjuhës, por kaq janë shumë pak për të rritur nivelin e studentëve pranë tij.
(www.mapo.al)
No comments:
Post a Comment