Hashashi nga Lazarati, një ish-polic bie në kurthin e agjentëve

Tiranë- Katër persona, mes të cilëve një ish-polic, kanë rënë në pranga dy net më parë, pasi akuzohen se ishin përfshirë në një rrjet të trafikut të hashashit. Gjatë operacionit, Policia e Tiranës ka sekuestruar 30 kg kannabis sattiva, e cila sipas të dhënave paraprake mësohet se ka ardhur nga Lazarati dhe kishte si destinacion...... tregun e brendshëm, por edhe atë ndërkombëtar. Burime zyrtare nga blutë e kryeqytetit bëjnë të ditur se të arrestuarit janë: Lavdrim Jata, 24 vjeç nga Paskuqani; Edmond Faja, 28 vjeç, ish-efektiv policie; Eduart Karaj, 23 vjeç; dhe Gojart Loçi, 30 vjeç. “Falë një hetimi disamujor, në ngarkim të personave të sipërcituar, u arrit të përcaktohet vendndodhja e tyre si dhe më pas arrestimi në flagrancë, arrestim i cili u realizua në afërsi të rrugës “Jordan Misja” në Tiranë. Pas kontrollit në bagazhin e automjetit “Benz 190“, me targa AA 642A I, u gjetën e u sekuestruan në cilësinë e provës materiale 5 qese, ku brenda tyre kishte afër 30 kg hashash” - bëri të ditur zëdhënësja e Policisë së Tiranës, Alma Katragjini. Gjithashtu, mësohet se gjatë këtij operacioni u sekuestruan edhe dy automjete tip “Benz 190“, me targa AA 642 AI dhe Rover, me targa TR 5905 J, si edhe 5 telefona celularë të markave të ndryshme.

Ky grup, prej disa kohësh ishte në vëzhgim nga ana e specialistëve të anti-drogës, pasi kishin ardhur informata të shumta në lidhje me aktivitetin e tyre të kundërligjshëm në shitjen e lëndëve narkotike. Referuar të njëjtave burime, mësohet se sasia e drogës kishte ardhur vetëm pak kohë më parë nga Lazarati, por nuk jepen detaje në lidhje me transportuesit e saj. Mësohet se operacioni i dy ditëve më parë është kryer me anë të blerjes së stimuluar, ku agjentë të anti-drogës janë ofruar si blerës të lëndës narkotike pranë 4 personave që e dispononin atë. Në momentin e marrjes së lekëve dhe dorëzimit të sasisë së hashashit kanë ndërhyrë dhe efektivët e policisë, të cilët kanë bërë të mundur arrestimin e tyre dhe sekuestrimin e kësaj sasie droge. Nga ana tjetër, katër të arrestuarit janë shoqëruar në ambientet e Policisë së Tiranës, ku janë marrë në pyetje në lidhje me destinacionin final të drogës dhe prejardhjen e saj. Në bazë të deklarimeve të tyre, është arritur të provohet se droga e kishte prejardhjen nga Lazarati dhe se ajo ishte e destinuar në tregun e brendshëm, por edhe për atë ndërkombëtar. Ndaj katër të ndaluarve u mor masa e arrestit në flagrancë për veprën penale “prodhim, shitje të lëndëve narkotike”, në bashkëpunim, si dhe materialet hetimore i kaluan Prokurorisë për veprime të mëtejshme. Ndërkohë, nga ana e saj Policia e Tiranës është duke vijuar punën për të identifikuar persona të tjerë të cilët mund të jenë të përfshirë në këtë linjë të trafikut të drogës.

(www.mapo.al)