Faith "no more"

Pieter Feith, në emër të vlerave evropiane, u angazhua që në Kosovë të instalohet parimi se “kush është nën hetime, nuk duhet të jetë pjesë e institucioneve”. Tash, është radha e tij ta përfillë këtë rregull. Analistë politikë thonë se pas publikimit të dokumenteve që tregojnë se ai është hetuar nga EULEX-i, Feith duhet ta shqyrtojë largimin nga pozita e Shefit të ICO-së.

Holandezi, si njeriu i parë i BE-së në Kosovë, kishte qenë i zëshëm sidomos gjatë një debati në Komitetin për Politikë të Jashtme të Parlamentit Evropian, ku kishte kërkuar në mënyrë eksplicite që zyrtarët kosovarë që janë objekt i hetimeve të japin dorëheqje derisa të mos sqarohen dyshimet për ta, shkruan Express

“Është praktikë në vendet demokratike që kur një personalitet publik që udhëheq funksione të larta është i dyshuar apo i akuzuar për korrupsion, ai të tërhiqet nga politika, së paku përkohësisht. Nëse pastrohet emri i tij, ai mund të kthehet në atë funksion. Kjo është një vlerë evropiane dhe unë kam dashur që këtë ta përcjell në Kosovë”.

Kjo ka qenë deklarata e shefit të ICO-së, Pieter Feith, e cila është përsëritur nga ai disa javë rresht para zgjedhjeve të fundit parlamentare në Kosovë.

Rasti i shefit të ICO-së, Pieter Feith i cili është hetuar nga EULEX-i për rastin e Bankës Qendrore të Kosovës dhe nuk ka marrë asnjë hap për zbatimin e “parimeve evropiane”, tregon se rregullat nuk vlejnë njësoj për të gjithë. 

(Telegrafi.com)