Putin: Berluskoni “një nga mohikanët e fundit”

Kryeministri rus, Vladimir Putin lëvdoi të premten cilësitë e Silvio Berluskonit si politikan, i cili njoftoi para disa ditësh dorëheqjen e tij si shef i qeverisë italiane, duke e përshkruar atë si “një nga mohikanët e fundit të politikës”.

“Mendoj se është një nga politikanët më të mirë të Evropës, megjithë qëndrimin e tij skandaloz me femrat”, deklaroi ai përpara ekspertëve ndërkombëtarë të Klubit Valdaï.

“Është një nga mohikanët e fundit në politikë”, përforcoi Vladimir Putin.

Nën presionin e tregjeve dhe pasi humbi shumicën, Kavalieri 75 vjeç njoftoi të martën se do të largohej nga detyra sapo parlamenti të miratonte një sërë masash buxhetore dhe ekonomike që i janë premtuar Bashkimit Evropian.

Vladimir Putin e përshëndeti gjithsesi punën e kryer nga Berluskoni.

“Fakti që ai është në pushtet është pa dyshim në favor të Italisë, sepse ai ishte një faktor stabiliteti për politikën e brendshme”, deklaroi ai.

“Ishte një njeri shumë i hapur, e thoshte gjithmonë atë që mendonte”, vijoi kryeministri rus.

Vladimir Putin dhe Silvio Berluskoni janë miq të vjetër dhe nuk e fshehin bashkëpunimin e tyre në të gjitha takimet që kanë.

/albanwes.gr/