Edhe Bosnja bëhet me McDonald’s. Pse Shqipëria nuk ka një të tillë?

Ka nga ata që mund të thotë që në fillim se ky lloj ushqimi ndoshta nuk na duhet. Mirëpo në mbarë botën, prania e një restoranti McDonald’s është një lloj treguesi. Disa thonë me humor se një vend që ka McDonald’s nuk sulmohet kurrë nga SHBA.
Ndërsa prestigjiozja britanike The Economist, ka krijuar një indeks shumë interesant për matjen e fuqisë blerëse, sipas çmimit që vendos McDonald’s për hamburgerin e saj Big Mac. Siç raporton Balkan Insight, Bosnja do bëhet me McDonald’s. Më 20 korrik hapet restoranti në Sarajevë. Por hapja e tij nuk ka qenë e lehtë për shkak të pengesave që hasen në një vend të korruptuar. Megjithatë ata ia kanë dalë. Boshnjakët e shohin si një ogur të mirë për investimet e huaja. Edhe çmimet do jenë të ulëta, duke justifikuar indeksin e Big Mac. Tani Shqipëria, dhe sigurisht edhe Kosova, mbeten të vetmit vende që nuk kanë një McDonald’s, simbol i globalizimit. Të paktën diçka e kemi të sigurt: SHBA nuk na sulmon kurrë.

(www.gazetatema.net)