“Siguria e jetës”, Policia Rrugore aksion në Gjirokastër

 

GJIROKASTËR- “Siguria e Jetës” ndëshkon shkelësit e ligjit për sigurinë rrugore. 110 gjoba janë vendosur vetëm për dy ditë tek drejtuesit e mjeteve për parkime te gabuara dhe mungesën e rripit të sigurimit, si dhe vjeljen e 765 masave administrative të prapambetura. Operacioni i koduar, ndërmarrë nga forcat blu të Komisariatit të Policisë së Gjirokastrës dhe Policisë Rrugore, ka ndëshkuar me masa administrative dhjetra drejtues mjetesh që qarkullojnë në akset rrugore në jug të vendit.

Sipas zëdhënësit të Policisë së Gjirokastrës, Gentijan Mullai, ky operacion, është aplikuar me rastin e sezonit të ri turistik që do të garantojë rendin në të gjitha pikat turistike dhe qendrat e banuara.

Policia rrugore e Qarkut, ka bllokuar për dy ditë, shtatë mjete për mangësi dokumentacioni. Sipas burimeve nga Policia Rajonale, në fokusin e rrugorëve, ka qenë edhe ndëshkimi i drejtuesve të mjeteve që qarkullojnë me xhama të zinj. Plot 82 automjete u janë hequr xhamat e zinj dhe ndërkohë që janë shoqëruar me masë administrative secili prej drejtuesve të mjeteve me 5 mijë lekë gjobë.

(panorama.com.al)