SHBA: Bin Laden financoi celulat në Shqipëri me më shumë se 600 mijë dollarë

Ish-lideri i Al Kaedës, i vrarë në një operacion special amerikan në Pakistan pak muaj më parë, Osama Bin Laden, ka investuar të paktën 600 mijë dollarë amerikanë për ngritjen e celulave terroriste në Shqipëri. Në vitin 1998, gjatë një operacioni të marinsave amerikanë u kapën në Tiranë disa të dyshuar, mes të cilëve edhe vëllai i kreut aktual të Al Kaedës, Mohamed Al Zawahiri, si pjesë e grupit të të kthyerve nga Shqipëria.

Në periudhën e viteve 1992-1999, sipas raporteve të CIA-s dhe Departamentit Amerikan të Shtetit, Shqipëria është kthyer në një strehë e të dyshuarve si islamistë apo terroristë, që fshiheshin pas fondacioneve bamirëse apo organizatave jofitimprurëse nga Lindja e Largët. Këto fondacione ngriheshin për të kamufluar aktivitetet me natyrë terroriste.

“Sipas informacioneve të Departamentit të Thesarit në Shtetet e Bashkuara të Amerikës, i publikuar në 2006, gjatë kësaj periudhe, kreu i Al Kaeda, Osama Bin Laden, financoi më shumë se 600 mijë dollarë për strukturat në Shqipëri, me qëllim ngritjen e grupeve të besueshme apo celulave që mund të përdoreshin për akte terroriste në të gjithë botën”, shkruan agjencia e lajmeve “Terra” në Spanjë. Për më tepër që Al Zawahiri, është konsideruar si lideri i një grupi “Xhihad”.

(www.ama-news.al)