Vrasja e trefishtë në Berat, pranga në Paris ish-policit

Interpoli arreston në Paris ish-policin e shpallur në kërkim prej 13 vitesh, pasi ishte dënuar me 21 vjet burg për vrasjen e tre personave në Berat.Drejtoria e Përgjithshme e Policisë së Shtetit njoftoi dje për arrestimin në Francë të 34-vjeçarit Malken Muho, i cili akuzohet për vrasje të trefishtë. Ngjarja për të cilën akuzohet Muho ka ndodhur më 27 korrik të vitit 1998, në një lokal pranë Spitalit në Berat, në lagjen “Kushtrimi”. Ai akuzohet se ka vrarë me breshëri automatiku brenda lokalit Englent Toskën, Gëzim Arapin dhe Mustafa Ruhjen, ngjarje e kryer në bashkëpunim me një person tjetër. Në lokal mbetën të plagosur edhe disa persona të tjerë, të cilët fatmirësisht i shpëtuan vdekjes. Dënimi për Muhon është dhënë nga Gjykata e Beratit më 26 maj të vitit 2003, pas një rihetimi që iu bë të gjitha dosjeve të vjetra të viteve 1997-1998, periudhë kur bandat kriminale e më pas edhe lufta mes pjesëtarëve të bandave sollën vrasjen e dhjetëra personave. Malken Muho u dënua në mungesë me 21 vjet burg, me akuzën e “vrasjes me dashje kundër më shumë se dy personave, e kryer në bashkëpunim”. Arrestimi i Muhos në Paris erdhi si rezultat i një bashkëpunimi mes oficerëve të Interpol Tiranës dhe Interpol Parisit dhe tashmë pritet të nisin procedurat për ekstradimin e tij.
VRASJA E TREFISHTE
Viti i trazirave kishte përfunduar, kohë kur në Berat dhe rrethinat e tij “ligjin” e bënin bandat kriminale, që vranë duke masakruar në forma nga më të ndryshmet dhjetëra persona. Disa muaj pasi kishte kaluar viti 1997 dhe pasi u përhap lajmi për vrasjen e Altin Dardhës, i cili drejtonte bandën më famëkeqe të asaj kohe, nisën edhe hakmarrjet mes grupeve. Banda të tjera rivale nisën të veprojnë dhe të kryenin krime të njëpasnjëshme, në shenjë hakmarrjeje për të gjitha ato vrasje dhe gjoba që kishin vënë 25 “djemtë” e Altin Dardhës, bashkë me atë në krye. Anëtarët e bandave nisën të vrisnin njëri-tjetrin, por edhe ata persona për të cilët dyshonin se i kishin “tradhtuar”. Policia në atë kohë e cilësoi si një vrasje të tillë edhe vrasjen e trefishtë të ndodhur në një lokal pranë spitaleve në Berat, ku mbetën të vrarë Englent Toska, Gëzim Arapi dhe Mustafa Ruhja, si dhe u plagosën edhe disa persona të tjerë. Autori i dyshuar, Malken Muho, dhe bashkëpunëtori i tij mundën të largoheshin e të mos identifikoheshin për rreth katër vjet, derisa ngjarja u rihetua nga Prokuroria. Gjatë procesit të rihetimit, u identifikuan autorët dhe u zbulua se tre viktimat kishin debatuar me ish-policin disa orë para se të ndodhte ngjarja. Ata e akuzonin si një “spiun” që donte të arrestonte pjesëtarët e bandave dhe ishin betuar se nuk do ta linin të qetë, derisa ai të hiqte dorë. Kjo dyshohet të ketë qenë edhe arsyeja që ish-polici Malken Muho ka vrarë 3 personat që e “kërcënonin”, edhe pse aksidentalisht ka plagosur edhe të tjerë.

(panorama.com.al)