Përpos fushës së blertë, Wayne Rooney duket se është lojtar i mirë edhe në videolojëra. Sulmuesi i Manchester Unitedit tregon se, pas ndeshjes me Manchester Cityn, kur shënoi gol në stilin gërshërë, ka shkuar në shtëpi dhe ka shkëlqyer edhe në ‘FIFA 2012’. “Pas golit me gërshërë në City, kam shkuar në shtëpi dhe kam luajtur online, duke e mposhtur Lescottin edhe në videolojë. Ishte një ditë e madhe për mua, si në fushën e vërtetë, ashtu edhe në videolojë”, thotë Rooney.
Se përfaqësuesi anglez është lojtar që i pëlqen videolojërat online, kjo dihet. Në të kaluarën, ai luante online kundër Cristiano Ronaldos, ndaj së cilit fitonte rregullisht. Ky është një pasion i kamotshëm i ish-futbollistit të Evertonit. “Që kur isha i vogël, e krijoja veten në lojë. Tash mund të luaj me vetveten dhe ta kaloj kohën”, shtoi Rooney.
Edhe mbrojtësi i Cityt, Lescott duket se është lojtar serioz. “Wayne më ka mësuar të luaj FIFA, por mund të themi se nxënësi e ka kaluar mësuesin. Aaron Lennon e John Terry mund ta dëshmojnë këtë, e kam mposhtur Rooneyn”, thotë Lescott.
Sulmuesi historik i Manchester Unitedit, Ole Gunnar Solskjaer, i cili tash e udhëheq ekipin Molde në atdhe, e përdor FIFA-n për t’i njohur më mirë kundërshtarët dhe për t’i përgatitur ndeshjes.
Kurse, sulmuesi i Real Madridit, Karim Benzema, po ashtu është lojtar i rregullt i kësaj videoloje. “Më kanë ndërtuar mirë, por ndoshta paksa me mungesë fuqie. Në realitet, unë jam i fuqishëm”, tha francezi.
(gazetaexpress.com)
No comments:
Post a Comment