Sequi: Procesi zgjedhor të përfundojë në mënyrë të pavarur

Ambasadori i Bashkimit Evropian Ettore Sequi deklaroi se procesi zgjedhor ende nuk është mbyllur duke shprehur besimin se ai do të përfundojë në mënyrë të pavarur dhe në përputhje me kuadrin ligjor.

"Në fund të vitit Bashkimi Evropian do të bëjë vlerësimin për pjekurinë demokratike të Shqipërisë. Komuniteti ka theksuar gjithnjë rëndësinë e madhe të zgjedhjeve lokale në vend", tha Sequi, në një deklaratë për mediat, pasi mori pjesë në një ekspozitë me piktura në "Shkollën e Kuqe", me rastin e 1 qershorit, ditës së fëmijëve.

Duke folur para fëmijëve, ambasadori u shpreh se të gjithë duhet të kontribuojnë dhe të kujdesen për të ardhmen e vendit.

Në këtë ekspozitë ishte edhe ministri i Mjedisit, Fatmir Mediu, i cili theksoi domosdoshmërinë e shtimit të mjediseve të gjelbra dhe të uljes së nivelit të ndotjes.

(top-channel.tv)