Partitë mbyllën në datat 5-6 fushatën e tyre zgjedhore në të gjithë vendin. Ndërkohë që Presidenti i Republikës u drejtua qytetarëve me një thirrje për pjesëmarrje në procesin e votimit, për të shkurtuar, sic tha ai, rrugën e Shqipërisë drejt BE-së.
Presidenti Topi apeloi për një proces të qetë e pa incidente dhe ftoi strukturat përkatëse të mbajtjes së procesit zgjedhor të tregojnë profesionalizëm. Apel për një proces të qetë bënë edhe ambasadorët ndërkombëtarë këtu në Tiranë.
Nga ana e saj, Policia e Shtetit në një deklaratë dhënë ditën e djeshme, tha se është tërësisht e përgatitur për të siguruar një proces zgjedhor të qetë në të gjithë vendin.
Ndërkohë, Komisioni Qendror i Zgjedhjeve, sic njoftohet në faqen zyrtare të internetit, do të mbajë në orën 11 të ditës së sotme një mbledhje me rend dite “për ndalimin e disa mjeteve që nuk parashikohen nga ligji në qendrat e votimit”.
Të gjithë shtetasit shqiptarë, mbi 18 vjeç, përfshirë këtu edhe ata që mbushin këtë moshë më 8 Maj kanë të drejtë të votojnë. Për të votuar duhet të jenë të pajisur me një dokument identifikimi, kartë identiteti dhe pasaportë (edhe jo biometrike, nëse nuk i ka mbaruar afati).
Qendrat e votimit hapen në orët e para të mëngjesit të ditës së dielë në të gjithë vendin.
(top-channel.tv)
No comments:
Post a Comment