Kontrata “speciale”
Një nga kontratat e Xhafer Isufit me kompaninë VEFA, në të cilën ishte i punësuar, është ajo me kod HBU, nr. kartele 7424 dhe me kontratë të tipit 6M8J. Sipas kësaj kontrate,
Xhafer Isufi ka derdhur në arkat e kompanisë VEFA 200 mijë lekë të reja si kapital dhe ka tërhequr më pas 3.517.270 lekë.
Plot 17,5 herë më shumë se sa ka derdhur. Sado të ketë qenë përqindja e interesit që ka përfituar Isufi nga Vehbi Alimuçaj, nuk ka logjikë të shpjegojë se si kapitali është rritur me 17,5 herë ose, e shprehur kjo në përqindje, 1750% të vlerës së investuar.
Nga ish-drejtues të filialeve të kompanisë VEFA mësuam se persona të veçantë brenda kompanisë gëzonin të drejtën e normave më të larta të fitimit, në raport me qytetarët e thjeshtë. Në këtë rang bënin pjesë edhe drejtuesit e filialeve, por ata kishin të drejtën e përfitimit rreth 2% më shumë se qytetarët e tjerë, por në asnjë rast nuk mund të
arrihet në të tilla përqindje.
“Vetëm Vehbi Alimuçaj mund të autorizonte tërheqje të tilla parash, jashtë logjikës me të
cilën funksiononte kompania. Arsyet i di vetëm Alimuçaj dhe ai që ka tërhequr, por gjithsesi e them me siguri se një kontratë me norma të tilla interesi nuk ekziston dhe një tërheqje e tillë është e pajustifikueshme”, shpjegon ish-funksionari i lartë i kompanisë.
Nga dokumenti që po i paraqesim lexuesit, dallohet qartë se gjithë qytetarët e tjerë kishin një tip kontrate, të përcaktuar se 6M5J, ndërsa emri i vetëm që ka një tip kontrate 6M8J është ai i Xhafer Isufit. Gjithashtu, e njëjta listë tregon se qytetarët e tjerë kanë marrë vlera parash të përafërta ose deri në dyfishin e kapitalit të investuar.
Një rast i vetëm është ai i një pagese që arrin në 5-fishin e kapitalit, ndërsa rasti i Xhafer Isufit është i pakrahasueshëm, plot 17 herë e gjysmë më shumë se sa ka investuar. Atëherë çfarë ishte realisht Xhafer Isufi brenda kompanisë VEFA?
Nga verifikimi i kodit te të gjithë emrave të shënuar në këtë listë pagesash, rezulton se kodi i tyre përfaqëson thjesht inicialet e emrit dhe mbiemrit, një verifikim që
lexuesi mund ta bëjë lehtësisht. Ndërsa në kartelën me numër 7424 kodi është HBU. Kush është ky person që ka depozituar këtë sasi parash në emrin e Xhafer Isufit dhe më
pas ka tërheqyr 17,5 herë më shumë se kapitali?
Dyshimet janë edhe më të mëdha teksa verifikohet se në depozitën e Xhafer Isufit në Dollarë, e cila është e regjistruar në të njëjtën kartelë, atë me numër 7424, kodi i tij është XHIS, pra korrespondon me emrin e tij.
Në fund të fundit, a ka patur persona të tjerë që kanë depozituar shuma minimale dhe kanë tërhequr sasi të mëdha në emrin e Xhafer Isufit?
Tërheqja “speciale”
Pas sekuestrimit të pasurive të firmave piramidale dhe ngrirjes së depozitave të tyre bankare, disa prej kreditorëve arritën të merrnin para nga bosët e dikurshëm. Likuidimi i
tyre u konsiderua i jashtëligjshëm nga grupi i mbikëqyrjes, i kryesuar atëherë nga Fahrudin Arapi.
Të gjithë kreditorët që morën para pas ngrirjes së llogarive bankare hynë në listën e
debitorëve ndaj shtetit, i cili filloi të administronte pasuritë e sekuestruara. Një nga këta kreditorë ishte edhe Xhafer Isufi.
Nga lista e veprimeve të arkës së kreditit, verifikohet se në datën 1 maj të vitit 1997, ndërsa llogaritë bankare të kompanisë VEFA ishin të ngrira, së bashku me disa qytetarë të tjerë, Xhafer Isufi ka tërhequr shumën prej 3.517.270 lekësh, të regjistruara në kontratën e tipit 6M8J me kod HBU dhe nr. kartele 7424.
Një nga ish-drejtuesit e kompanisë VEFA sqaroi për gazetën “Shekulli” se dokumenti që disponon redaksia vërteton pagesat e kryera deri ne ditën dhe orën kur është printuar, pra deri në 1 maj 1997, ora 09.55. Kjo nuk është domosdoshmërisht dita kur është bërë likuidimi, por ai nuk është bërë në një periudhë të largët nga dita e printimit, një periudhë që normalisht nuk është më shumë se 1 muaj.
“Gjithsesi janë kryer pasi janë ngrirë llogaritë bankare të kompanisë”, sqaroi ish funksionari.
Komisioni “Arapi”
Misteri i parave të tërhequra ndërsa kompania ishte nën sekuestro ka edhe pika të tjera të errëta. Burime nga grupi i mbikëqyrjes së kompanisë VEFA kanë bërë të ditur se, ndërsa gjithë qytetarët që kanë tërhequr paratë jashtë afatit ligjor figurojnë në listën e debitorëve ndaj shtetit, emri im Xhafer Isufit nuk ndodhet në këtë listë.
Një arsye më shumë për të dyshuar se pas ardhjes në pushtet të qeverisë ku anëtar kabineti ishte dhëndri, Lulzim Basha, nga ky komision “i transparencës” mund të jenë zhdukur shumë dokumente, sikurse u zhdukën paratë e Vehbi Alimuçajt.
Paratë në tragete
Të shumta kanë qenë dëshmitë e viteve të fundit ku tregohet se si automjete të kompanisë VEFA mbërrinin në portin e Durrësit në përfundim të procedurave të imbarkimit. Të shoqëruara nga skorta të armatosura, ato vononin edhe nisjen e trageteve të linjës Durrës-Bari, duke u imbarkuar në orare të vona me sa më pak dëshmitarë.
Ish-drejtues të kompanisë dhe dëshmitarë okularë kanë treguar se në fillim transferuat e valutës kryheshin me valixhe, nëpërmjet katamaranit “La Vikinga” të linjës Durrës-Bari, ndërsa më pas, sidomos në dimrin 1996-1997 filluan të transportoheshin me tragetin e shoqërisë “Adriatica”.
Një “Wolksvagen” i bardhë i blinduar shërbente për transportimin e valutës, ndërsa në Bari e priste vetë drejtuesi i shoqërisë “Agestea”, Mimo Stea, për t’u siguruar se ngarkesa kishte mbërritur me sukses.
Ende nuk është zbardhur se çfarë transportohej në ato automjete që dilnin të parat nga trageti dhe shpërndaheshin në Europë, por dyshimet në gjithë këto vite kanë qenë se shumë prej parave të ish-bosit të VEFA-s, Vehbi Alimuçaj, janë shpërndarë nëpër
Europë, pa lënë gjurmë nëpër llogari bankare, nën emra njerëzish të tij të afërt që kanë shërbyer si koperturë.
Të tjera para kanë dalë nëpërmjet llogarive bankare, të maskuara me blerje pajisjesh apo lëndësh të para. Një nga rastet e fundit të denoncuar në media ishte llogaria në Hungari prej 900 mijë eurosh të cilat Alimuçaj deklaronte se “nuk e dinte që ekzistonin”.
Natyrisht, askush nuk pret që Lulzim Basha të sqarojë se ku ndodhen paratë që Alimuçaj
nxori jashtë Shqipërisë dhe kush i disponon. Por të paktën ai mund të bëjë transparente të ardhurat e tij dhe të bashkëshortes së tij, për të treguar se pasuria e tij prej afro 1 milion dollarësh nuk e ka burimin nga kursimet e atyre mijëra shqiptarëve që morën armët në vitin 1997.
Dhe se fshehja e parave të VEFA-s nuk është arsyeja pse bashkëshortja e tij nuk pranon të jetë shtetase shqiptare.
Tërheqje mijëra dollarëshe, kur VEFA ishte ngrirë
Ndërkohë, një dokument i dytë, vërteton se në të njëjtën ditë, Xhafer Isufi ka tërhequr në
arkat e VEFA-s shumën prej 65.368 dollarësh amerikanë. Sipas këtij dokumenti, vërtetohet se ai ka “zbrazur” llogarinë me kod XHIS dhe numër kartele 7424 ku kishte përfituar edhe 34.368 dollarë interesa.
Kontrata është e tipit 6M5J dhe paratë janë tërhequr sërish në kushtet kur llogaria bankare e kompanisë VEFA ishte e ngrirë, ndërsa asetet e saj, të sekuestruara. Veprimet janë kryer pranë arkës së kreditit të Tiranës. Nuk dihet sa tërheqje të tilla mund të ketë bërë personi në fjalë, por ish-punonjës të firmave piramidale tregojnë
se as ata vetë nuk mundeshin të përfitonin interesa kaq të mëdha apo tërheqje në kushte mbylljeje, siç dëshmojnë këto dy kontrata.
VEFA dhe bosi i dënuar
Vehbi Alimuçaj ishte bosi i kompanisë “VEFA”. Ai u dënua me 20 vjet burg për veprën penale të “vjedhjes me anë të mashtrimit në përpjesëtime të mëdha”. Alimuçaj u arrestua më 28 prill të viti 1998 në Tiranë, por u lirua përpara se të mbaronte dënimi, pasi përfitoi
nga një falje. Kompania VEFA me president Vehbi Alimuçën u krijua më 1993 dhe numëronte 57.923 kreditorë, me hua të marrë prej tyre në vlerë totale 325.300.000 USD.
No comments:
Post a Comment